Boar biil jaar, ka Robaan in de laita ba gheet abe ka dar prukken ubar s taal, ista gabest an groossa biisa ba habanza gakhuzet un gagrazet sobel de khuu bedar de ooben,
An tag an saafar darbail an gasergach memme zain pruudare ba ist gabest au in de biisen met ime so huttan de zachen hatt-arn gatootet.
Bon in vaazen bolla pluut zeint-za khent aufar kloone roote-orken ganamet salbanele. Diise habent galoofet naach me tootarn ba bollar borte issich gajiukhet iidar in ‘s taal bon in rooghen un kronichen steeln un ist gastorbet.
Bon demme taaghe buar de salbanele habent gadaurt so tutzalan ‘s pluut in oben un in kuun ba seint gant aizan in doi biisa, ba amme lesten ist gabest borlasset bon allen bon dar borte.
An saafar bon Robaan ba hat gahat khoona andara zaita so gheenan aus metten zain zachen, hattar gabelt machan dorplintzegan bor saldo dii lepighen roote -orkalen bon da au pauganten an pillale in eare dar Madoan. Badar de knotten au gallummet pa taghe bor ‘s pillale zeintza khent bostroipelt pa dar nacht.
Denne an nacht dar saafar hat gasuntet aan an grooes boar, augamachet an altar knotten met au ‘s obarst an pilde bonnara Madoan un aso hattar gamocht au paugan an pillale ba an bissof is kent so baigan. Bon demme taaghe buar de salbanele zeint dorsbintet dehiin bor hortan bon doar borlasset un dorbillarne laghe-staat ba, noch hoite pa taghe ista an pillale in eare dar Madoan so gadenkhan diizes gasegach.
Angelo Frigo
